طريقة عمل الزبادي البلدي
الخطوة الأولى … لازم تعمل (حضانة) .. هي عبارة عن صندوق خشب المقاس حسب نوع الاستخدام ..تجاري أو منزلي …بالنسبة للاستخدام المنزلي الصندوق يكون مقاس نص متر * نص متر * نص متر (طول عرض ارتفاع ) تقريبا بنفس حجم فريزر التلاجة 16قدم … طيب بعد تعمل الصندوق يكون طبعا عندو باب في واحد من الاتجاهات … وتشوف كهربجي من الحلة يوصل ليك فيهو بوردين لمبة عادية تنجستن (اللمبة الحمرا ) ويطلع منهم سلك واحد فيهم بلك عشان الصندوق يكون متحرك وتقدر تختو في اي حته .. ولازم الصندوق يكون محكم من كل الجنبات وما يكون فيهو اي فتحة تدخل أو تطلع هوا … والصندوق ده بعيش كتير انا عندي واحد في البيت ليهو 8 سنة … طيب الموضوع ده كلو لي شنو ؟ …لانو الزبادي عشان يطلع متماسك محتاج درجة حرارة ثابتة لمدة 6ساعات بالضبط والحرارة دي بتوفرها اللمبتين …
تشتري 8 رطل لبن وتفور اللبن …وبعد تنزل اللبن من النار ما تخليهو يبرد براهو …تبردو إنت بي كباية قزاز كبيرة .. بعد كل 10 دقائق تقوم تبرد اللبن والحركة بنسميها كسر الدهون داخل اللبن ..عشان بعدين تضوق طعم اللبن والسمنة في الزبادي … وبعد ما يصل اللبن لي درجة حرارة دافئة (يعني تدخل أصبعك وتحس بي لسعة خفيفة ) تجيب نص ملعقة كبيرة زبادي بلدي أو زبادي دايمة … وتخلطها شديد في اللبن ..وتكب اللبن في جردل البلاستيك الابيض الشفاف سعة 10 رطل ويكون الجردل عندو غطا كويس … وتدخل الجردل جوة الحضانة (صندوق الخشب العملناهو قبيل ) ..وتخت البلك في الكهربا .. بعد 6 ساعات حا تجي تلقى زبادي مافي أي مصنع في البلد دي يقدر يعمل زيهو … وتشيل الجردل تدخلو التلاجة .
و يمكنك التعرف على طرق اخرى لعمل الزبادي من خلال : طريقة عمل الزبادي